Уҡытыусы һәм тәрбиәсе - иң яуаплы һөнәр эйәләренең береһе. Уларға   йәштәрҙе- илебеҙҙең киләсәген тәрбиәләү ышанып тапшырылған. Изге һөнәр эйәләре тураһында Зәки Сөләймәнов былай ти:

 Уҡытыусы эшен баһаларға
 Табылмаған әле үлсәмдәр.
 Үҙ хәленән сығып баһа бирә
 Дәрес үткәргәнен күргәндәр.
 
 Дәрес үткәреүе – был эштең бер
 Иң яуаплы ҡыҫҡа өлөшө.
 Уҡытыусы эше – айсберг булһа,
 Дәрес –һыуҙан өҫкө өлөшө.

           Беҙҙең гимназия Уҡытыусылар көнөн ныҡлы әҙерлек менән ҡаршы алды. Гимназистар үҙҙәрен уҡытыусы урынында һынап ҡаранылар, ә уҡытыусылар киреһенсә, бала-саҡ иленә ҡайтҡандай, шаян уҡыусы булдылар. Тантаналы линейка, уҡытыусыларға,тәрбиәселәргә саф йөрәктән бирелгән гөлләмәләр, уҡыусыларҙың рәхмәтле йөҙҙәре, диуарҙарҙағы төҫлө ҡотлауҙар байрамды ысын мәғәнәлә йәнләндерҙе. Ойоштороусыларҙың сараға яуаплы ҡарауы, юғары кимәлдәге әҙерлек- һәр береһенең йөҙөндәге йылмайыуында сағылды.
           Уҡытыусыларға оҙон ғүмер,ныҡлы һаулыҡ,түҙемлек, эштәрендә уңыштар, балаларға артабан да төплө белем биреүҙәрен, өлгөлө уҡыусылар, күберәк шатлыҡлы ваҡыттар теләп ҡалам.

                                                                   Гөлназ Ишемғужина, йәш хәбәрсе